मोदीले शनिवार प्रधानमन्त्रीको सपथ लिने, प्रधानमन्त्री दाहालपनि सहभागी हुने

 

 

प्रधानमन्त्री नरेन्द्र मोदीले शनिबारमा तेस्रो पटक प्रधानमन्त्रीको शपथ लिने भएका छन् । यसैविच प्रधानमन्त्री पुष्पकमल दाहालपनि मोदीले तेस्रो कार्यकालका लागि लिने सपथ ग्रहण समारोहमा सहभागी हुने भएका छन् । प्रधानमन्त्री दाहाल, भुटानी राजा, श्रीलंकाका रास्ट्रपति, बंगलादेश तथा मौरिससका प्रधानमन्त्रीहरु पनि सपथ ग्रहण समारोहमा सहभागी हुने बताइएको छ । सन् २०१४ मा एकल बहुमत आएको सरकार बनाएर सपथ गरेका मोदीले विदेशी सरकार तथा रास्ट्रप्रमुख बोलाएका थिए । त्यो बेला उनले सार्क देशलाई निम्तो दिएका थिए । यो पटक अफगानिस्तान र पाकिस्तान बाहेकका सरकार प्रमुखलाई निम्ता दिइएको छ । प्रधानमन्त्री मोदीको दिल्लीस्थित निवासमा बुधबार बसेको भाजपा नेतृत्वको राष्ट्रिय लोकतान्त्रिक गठबन्धन एनडीएको बैठकमा मोदीको नेतृत्वमा नयाँ सरकार गठन गर्ने विषयमा सहमति भएको छ । बैठकमा जनता दल युनाइटेड प्रमुख नीतीशकुमार र तेलुगु देशम पार्टी टीडीपी प्रमुख एन चन्द्रबाबु नायडूको सहभागितालाई महत्त्वपूर्ण कदम मानिएको छ । भाजपालाई सरकार बनाउन उनीहरूको दलको समर्थन महत्त्वपूर्ण छ । यसपटकको लोकसभा निर्वाचनमा भाजपा बहुमतको आँकडा दुई सय ७२ भन्दा ३२ सिटले पछि परेको छ र सरकार बनाउन उसले आफ्ना सहयोगीमा निर्भर रहनुपर्नेछ । भारतको निर्वाचन आयोगले मङ्गलबार सार्वजनिक गरेको नतिजा अनुसार भाजपाले दुई सय ४० सिट र काङ्ग्रेसले ९९ सिट जितेका छन् । भाजपाले सन् २०१९ को आम चुनावमा तीन सय तीन र सन् २०१४ को आम चुनावमा दुई सय ८२ सिट जितेको थियो । यसैबीच केन्द्रीय मन्त्रिपरिषद्को सिफारिसपछि राष्ट्रपति द्रौपदी मुर्मूले बुधबार १७ औँ लोकसभा विघटन गरेकी छन् । यसअघि प्रधानमन्त्री मोदीले आफ्नो मन्त्रिपरिषद्सहितको राजीनामा राष्ट्रपति मुर्मूलाई बुझाएका थिए । राष्ट्रपतिले राजीनामा स्वीकृत गर्दै नयाँ सरकार गठन नभएसम्म प्रधानमन्त्री र उनको मन्त्रिपरिषद्लाई निरन्तरता दिन आग्रह गरेकी छन् ।।