राष्ट्रसंघ सुरक्षा परिषद्द्वारा इजरायल र हमासबीच युद्धविराम गर्ने प्रस्ताव बहुमतले पारित

संयुक्त राष्ट्रसंघ सुरक्षा परिषद्मा गाजा क्षेत्रमा युद्धविराम गर्ने प्रस्ताव पारित भएको छ । अमेरिकाले सुरक्षा परिषद्मा प्रस्ताव गरेको इजरायल–गाजा युद्धविराम योजना पारित भएको हो । सुरक्षा परिषद्का १५ सदस्यमध्ये १४ सदस्यले अमेरिकाले तयार पारेको प्रस्तावको पक्षमा मतदान गरेका थिए । रुस भने मतदानमा अनुपस्थित रहेको छ । इजरायलले सो प्रस्तावलाई आत्मसात् गर्ने विषयमा शंका रहेकाले अनुपस्थित भएको रुसको दाबी छ । बन्धक अदान प्रदान, दुवै पक्षबीच स्थायी रुपमा शत्रुता अन्त्य र गाजाको पुनर्निर्माण गरी तीन चरणमा युद्ध विराम गर्ने गरी अमेरिकाले प्रस्ताव ल्याएको थियो । इजरायली प्रधानमन्त्री बेन्जामिन नेतन्याहुले  सो प्रस्तावप्रति सार्वजनिक रुपमै असहमति जनाउँदै गाजाबाट हमासको अन्त्य नभएसम्म सैन्य कारबाही जारी राख्ने बताएका छन । हमासले  उक्त प्रस्तावको स्वागत गर्दै आफूलाई साबित गर्ने मौका आएको बताएको छ । इजरायलले गाजा क्षेत्रमा आठ महिना अघिदेखि आक्रमण जारी राखेको छ । जसका कारण उक्त क्षेत्रमा मानवीय संकट उत्पन्न भएको छ । इजरायल र प्यालेस्टिनीबीचको युद्धमा गाजा क्षेत्रमा ३७ हजार ८४ जनाको मृत्यु भएको छ । नुसिरात शरणार्थी शिविरमा शनिबार मात्र इजरायली आक्रमणमा कम्तिमा २ सय ७४ जनाको ज्यान गएको छ ।