आज विश्व दूध दिवस नेपालमा पनि मनाइयो

 काठमाडौ । आज विश्व दूध दिवस नेपालमा पनि मनाइयो । संयुक्त राष्ट्रिय संघको खाद्य तथा कृषि सङ्गठन एफएओले २००१ जुन एकदेखि विश्व दुध दिवस मनाउन सुरु गरेको हो । ‘ दुध तथा दुग्ध पदार्थको सेवन, दुग्ध व्यवसायको प्रवर्धन’ मूल नाराका साथ यस पटक २४ औँ दुध दिवस मनाउन लागिएको हो । नेपालमा विभिन्न कार्यक्रम गरी जेठ १४ गतेदेखि नै यो दिवस मनाउन सुरु गरिएको नेपाल डेरी एसोसिएसनले जनाएको छ । विश्वमा दुग्ध क्षेत्रले पोषण तथा खाद्य सुरक्षण एवं जीविकोपार्जनमा पु¥याएको योगदानको मनन गर्दै दुधको उपभोगमा वृद्धि गर्ने उद्देश्यले दिवस मनाउन लागिएको हो । विश्वले दुध दिवस मनाइरहेका बेला नेपालका दुध किसानले साढे तीन अर्ब रुपियाँ बक्यौता रकम भुक्तानी पाएका छैनन् । कृषि तथा पशुपन्छी विकास मन्त्रालयले गठन गरेको अध्ययन समितिले तयार पारेको प्रतिवेदन अनुसार दुध किसानलाई तीन अर्ब ४० करोड रुपियाँ भुक्तानी गर्न बाँकी रहेको छ । त्यति नै मात्रामा दुग्धजन्य पदार्थ मौज्दात रहेको समितिको प्रतिवेदनमा उल्लेख छ । प्रतिवेदन अनुसार डेरी उद्योगीसँग चार अर्ब ६० करोड रुपियाँ बराबरको दुग्धजन्य पदार्थ मौज्दात रहेको छ । दुग्धजन्य पदार्थ मौज्दात रहेका कारण समयमा भुक्तानी गर्न समस्या भएको बताउँदै डेरी उद्योगीले सरकारले बजेटमा केही राहतको व्यवस्था गर्ला भनी आस गरेको तर केही नआएको गुनासो गरेका छन ।