व्यावसायिक आलु खेतीतर्फ आकर्षित हुँदै लुप्राङका किसान

पर्वतको जलजला गाउँपालिका–९ बनौ लुप्राङका किसान व्यावसायिक आलु खेतीतर्फ आकर्षित भएका छन् । जिल्लामै स्वादिलो र गुणस्तरीय आलु उत्पादनका लागि बनौं लुप्राङले नाम समेत कमाएको छ । उत्तरतर्फ फर्किएका फाँटमा उत्पादन हुने यहाँको आलु स्वादिलो हुने भएकाले मुल्य पनि राम्रो पाउने गरेको छ  
समूहमा आबद्ध भएका किसानले न्यूनतम एक लाखदेखि १० लाखसम्म आलु बिक्री गरेर आम्दानी गर्ने अपेक्षा राखेका छन ।अहिले आलु खन्ने र थन्क्याउने बेला भएकाले केही समयमा आलु उत्पादनको यकिन तथ्यांक आउने  कृषि ज्ञान केन्द्रले जनाएको छ । 
विगतमा एक रोपनी क्षेत्रफलबाट कम्तीमा पाँच मुरी आलु उत्पादन हुने गरेकामा अहिले दोब्बर उत्पादन हुन थालेको छ । लुप्राङको बनौ गाउँमा मात्र चार सय रोपनी क्षेत्रफलमा आलु उत्पादन हुने गरेको छ । बनौमा रहेका दुई आलु उत्पादक समूहमा आबद्ध ७३ किसानले सामूहिकरुपमा आलु उत्पादन गरिरहेका छन ।