लगानी सम्मेलनका लागि कानुन संशोधन अध्यादेश राष्ट्रपति समक्ष सिफारिस

सरकारले लगानी सहजीकरण सम्बन्धी केही नेपाल ऐनलाई संशोधन गर्न बनेको अध्यादेश जारी गर्न राष्ट्रपतिलाई सिफारिस गरेको छ । आज बसेको मन्त्रिपरिषद्को बैठकले लगानी सम्मेलनलाई लक्षित गरी कानुन संसोधनका लागि राष्ट्रपति समक्ष सिफारिस गरेको हो । अध्यादेशमार्फत विभिन्न ८ वटा ऐनका विभिन्न व्यवस्था संशोधन गर्न सरकारले सिफारिस गरेको हो । बैशाख १६ र १७ गते हुन लागेको तेस्रो लगानी सम्मेलनलाई लक्ष्य गरेर सरकारले अध्यादेश सिफारिस गरेको हो । उद्योग स्थापना, सन्चालन तथा सुरक्षासँग सम्बद्ध विभिन्न  ऐन संशोधन गर्न अध्यादेश ल्याउन लागिएको हो । अध्यादेशमार्फत भूमिसम्बन्धी ऐन, जग्गा प्राप्ति ऐन, विद्युतीय कारोबार ऐन,  विशेष आर्थिक क्षेत्र ऐन, विदेशी लगानी तथा प्रविधि हस्तान्तरण ऐन, सार्वजनिक निजी साझेदारी तथा लगानी ऐन, वन ऐन  र औद्योगिक व्यवसाय ऐनलाई संशोधन गर्न लागिएको होरु। त्यस्तै  सरकारले कतारका अमिर राजा शेख तमिम बिन हमाद अल थानीको राजकीय भ्रमणको क्रममा भोलि सार्वजनिक बिदा दिएको छ ।  साथै मन्त्रिपरिषद बैठकले अर्थ मन्त्रालयको सचिवमा मधु कुमार मरासिनीलाई सरुवा गर्ने निर्णय गरेको छ । पेमेन्ट गेटवे अनियमितता प्रकरणमा विशेष अदालतमा भ्रष्टाचार मुद्दा परेपछि उनी निलम्बनमा परेका थिए । तर अदालतले उनलाई सफाइ दिएपछि उनको निलम्बन फुकुवा भएको थियो ।