इलाम–२ को उपनिर्वाचनमा एमाले सुहाङ नेम्वाङलाई उमेदवार बनाउने

नेकपा एमालेले इलाम क्षेत्र नम्बर–२ को उपनिर्वाचनमा सुहाङ नेम्वाङलाई उमेदवार बनाउने निर्णय गरेको छ । आज बसेको सचिवालय बैठकबाट नेम्वाङलाई उमेदवार बनाउने निर्णय गरेको हो । सुहाङ दिवंगत नेता, संविधानसभाका अध्यक्ष एवं एमालेका तत्कालीन उपाध्यक्ष सुवास नेम्वाङका कान्छा छोरा हुन् । यस्तै, बझाङ क्षेत्र नम्बर–१ ‘क’मा दमनबहादुर भण्डारीलाई उमेदवार बनाउने निर्णय एमालेले गरेको छ । भण्डारी एमाले बझाङ जिल्ला अध्यक्ष हुन् । उमेदवारका पक्षमा समर्थन गर्न सत्ता साझेदार दललाई अपिल गर्ने निर्णय पनि एमालेले गरेको छ । 
आउँदो वैशाख १५ गते ती क्षेत्रमा उपनिर्वाचन हुँदै छ । त्यसका निम्ति यही चैत २४ गते उमेदवारी दर्ता गर्ने कार्यतालिका छ । गत भदौ २६ गते एमालेका उपाध्यक्ष तथा संविधान सभाका अध्यक्ष सुवास नेम्वाङको निधन भएपछि इलाम क्षेत्र नम्बर २ रिक्त  छ । यस्तै सचिवालय बैठकले ऐन महरलाई पुनः केन्द्रीय सदस्यको जिम्मेवारी दिने निर्णय गरेको छ । गत फागुन ३ गते बसेको एमाले सचिवालय बैठकले महरले केन्द्रीय सदस्यबाट दिएको राजीनामा स्वीकृत गरेको थियो । तर आजको बैठकले महरलाई फेरि केन्द्रीय सदस्यमा फर्काउने निर्णय गरेको हो । २०७९ को प्रतिनिधिसभा निर्वाचनमा बझाङबाट प्रतिस्पर्धा गरेका महर नेकपा एकीकृत समाजवादीका भानुभक्त जोशीसँग पराजित भएका थिए ।  उनी र एकजना युवतीको नाममा सामाजिक सञ्जालमा विवादित अडिओ र भिडिओ भाइरल भएपछि विवादमा तानिएका थिए ।