काठमाडौं। कोशीदेखि गण्डकीसम्मको भूभागमा गएको १२ घन्टामा मध्यमसम्मको वर्षा भएको छ। बंगालको खाडीमा विकसित अर्नब चक्रवात र पश्चिमी वायुको आंशिक प्रभावले कोशीदेखि गण्डकी प्रदेशका भूभागमा बिहीबार बेलुकीदेखि पानी परिरहेको छ।
लुम्बिनी, कर्णाली र सुदूरपश्चिमका भूभागमा पनि छिटपुट वर्षा भएको जल तथा मौसम पूर्वानुमान महाशाखाको रेकर्डमा देखिन्छ। पछिल्लो १२ घन्टामा काभ्रेको रोशीमा सबैभन्दा बढी ३३ मिलिमिटर वर्षा भएको छ। त्यस्तो सोलुखुम्बुको पेकरनासमा २९.८ मिलिमिटर, खोटाङको कुर्लेघाटमा २७ मिलिमिटर, काभ्रेकै खोपासीमा २७ मिलिमिटर, सिन्धुलीको नेपालथोकमा २२.६ मिलिमिटर, काठमाडौंको सुन्दरीजलमा २२.४ मिलिमिटर, ललितपुरको खोकनामा २४.२ मिलिमिटर वर्षा मापन भएको छ।
महाशाखाले शुक्रबार दिउँसो कोशी, मधेश, बागमती, गण्डकी र लुम्बिनी प्रदेशको थोरै स्थानमा तथा कर्णाली र सुदूरपश्चिम प्रदेशका हिमाली र पहाडी भू-भागका एक-दुई स्थानमा भारी वर्षा तथा हिमपातको सम्भावना रहेको जनाएको छ। कोशी, मधेश, बागमती, गण्डकी र लुम्बिनी प्रदेशका तथा कर्णाली र सुदूरपश्चिम प्रदेशको हिमाली भूभागको अधिकांश स्थान, कर्णाली र सुदूरपश्चिम प्रदेशको बाँकी भू-भागका धेरै स्थानमा भने मेघगर्जन चट्याङ्ग सहित मध्यमसम्मको वर्षा तथा हिमपातको सम्भावना छ।
मधेश, बागमती, गण्डकी र लुम्बिनी प्रदेशको तराई भू-भागका केही स्थानमा हावाहुरीको समेत सम्भावना रहेको पनि महाशाखाले जनाएको छ। शुक्रबार राति देशभर अधिकांश बादल लाग्ने पूर्वानुमान छ। राति देशका अधिकांश स्थानमा मेघगर्जन चट्याङ्ग सहित मध्यमसम्मको वर्षारहिमपातको सम्भावना छ। थोरै स्थानमा राति पनि भारी वर्षा तथा हिमपात सम्भावना रहेको महाशाखाले जनाएको छ।
