प्रधानमन्त्री दाहालकी पत्नी सीता दाहालको ६९ वर्षको उमेरमा निधन

प्रधानमन्त्री पुष्पकमल दाहालकी पत्नी सीता दाहालको ६९ वर्षको उमेरमा निधन भएको छ । आज बिहान थापाथलीस्थित नर्भिक अस्पतालमा उपचारका क्रममा दाहालको निधन भएको हो । पार्किन्सन जस्तो देखिने एक जटिल प्रकारको रोग ‘प्रोग्रेसिभ सुपरान्युक्लियर पाल्सी अर्थात पीएसपीबाट पीडित दाहाल लामो समयदेखि थला परेकी थिइन । स्वास्थ्य अवस्था जटिल बनेपछि उनलाई आज विहान नर्भिक अस्पताल लगिएको थियो । दाहाललाई बुधबार बिहान आठ बजे हृदयघात भएपछि अस्पताल लगिएको थियो । उपचारकै क्रममा उनको आठ बजेर तेतिस मिनेट जाँदा निधन भएको नर्भिक अस्पतालले जानकारी दिएको छ । दाहालको अमेरिका, भारत र सिंगापुरमा उपचार गर्दा पनि उनको रोग निको हुन सकेको थिएन । दाहाल नेकपा माओवादी केन्द्रकी सल्लाहकार समेत थिइन । प्रधानमन्त्री दाहालको सचिवालयका अनुसार श्रद्धाञ्जलीका लागि सीता दाहालको पार्थिव शरीर बिहान एघार बजेदेखि दिउँसो एक बजेसम्म पार्टी केन्द्रीय कार्यालय पेरिसडाँडा, कोटेश्वरमा राखिनेछ । अन्तिम संस्कार भने दिउँसो दुई बजे पशुपति आर्यघाटमा गरिने बताइएको छ । दाहालको निधनप्रति प्रमुख दलका नेता तथा सर्वसाधारणले दुःख प्रकट गर्दै श्रद्धाञ्जली प्रकट गरेका छन ।