काठमाडौ । जेनजी प्रदर्शनका क्रममा ज्यान गुमाएका ३० वटा शवको पोस्टमार्टम गरिएको छ । तीमध्ये २७ वटा शव परिवारले बुझेका छन् । भदौ २३ र २४ गते भएको प्रदर्शनका क्रममा मृत्यु भएका ४६ जनाको शव पोस्टमार्टमका लागि शिक्षण अस्पताल महाराजगञ्जको फोरेन्सिक विभागमा छ । विभागका अनुसार अब १६ वटा शवको पोस्टमार्टम गर्न बाँकी छ । पोस्टमार्टम गर्न बाँकीमध्ये ७ वटा शव पूर्ण रूपमा जलेकाले डीएनए परीक्षणबाट पहिचान गरिने विभागले जनाएको छ । आफन्तले दिएको विवरण र क्लिनिकल तथ्यको आधारमा एक अर्काको विवरण हेरेर पहिचान गरिने जनाइएको छ । प्रहरीको तथ्यांकअनुसार प्रदर्शनका क्रममा देशभर ७२ जनाको मृत्यु भइसकेको छ ।
