नेपाली कांग्रेस केन्द्रीय समिति बैठकमा सदस्यहरुले धारणा राख्ने क्रम जारी रहेको छ । मंगलबारदेखि जारी बैठकमा हिजोदेखि केन्द्रीय सदस्यहरुले धारणा राख्न थालेका हुन । आजको बैठकमा नक्कली शरणार्थी प्रकरणमा पक्राउ परेका पूर्वगृहमन्त्रीसमेत रहेका पार्टीका केन्द्रीय सदस्य बालकृष्ण खाणबारे प्रश्न उठेको छ । केन्द्रीय सदस्य अजयबाबू शिवाकोटीले खाणबारे अचम्मको दुविधा रहेको बताएका हुन । उनले खाणप्रति अन्याय भएको हो भने वर्तमान सरकारबाट कांग्रेस हट्नुपर्ने धारणा राखे । होइन भने आफ्नै नेताहरू संलग्न भएको सरकारले थुनामा पठाउँदा आरोपितलाई पार्टीबाट निलम्बन गर्नुपर्छ कि पर्दैन ?भनेर उनले प्रश्न गरे । बैठकमा कोशी प्रदेश सरकारलाई लिएर आरोप प्रत्यारोप भएको छ । केन्द्रीय सदस्य केशवकुमार बुढाथोकीले नेपाली कांग्रेस नेतृत्वकै कोशी प्रदेश सरकारको आलोचना गरेपछि मुख्यमन्त्री उद्धव थापा उनीविरुद्ध खनिएका हुन । बुढाथोकीले बुधबारको बैठकमा बोल्ने क्रममा कोशीमा कांग्रेस नेतृत्वको सरकारको हैसियतमाथि कानुनी प्रश्नसमेत उठाएका थिए । थापाले बाबुराम गौतम प्रदेश सभाको सभामुख मात्रै नभइ प्रदेश सभा सदस्यसमेत रहेको जिकिर गरे । गण्डकी प्रदेशका मुख्यमन्त्री एवम् कांग्रेस केन्द्रीय सदस्य सुरेन्द्रराज पाण्डेले महामन्त्री गगन थापाले दिएका अभिव्यक्तिले पार्टीप्रति नकारात्मक भ्रम फैलिएको भन्दै जथाभावी नबोल्न सचेत गराए । महामन्त्री थापाले संसदीय दलको नेता फेर्न प्रयास गरिरहेको भन्दै दिएको अभिव्यक्तिप्रति लक्षित गर्दै बोल्नेभन्दा व्यवहारमा गरेर देखाउन उनले चुनौती दिएका हुन । उनले पार्टीका अघिल्तिर देखिएका चुनौतीहरूलाई सबैले एकतावद्ध भएर पार लगाउनुको विकल्प नभएको दाबी गरे । नेपाली कांग्रेसकी केन्द्रीय सदस्य उर्मिला नेपाल केसीले नेतृत्व परिवर्तनको कुरा बेमौसमको बाजा भएको बताइन । पार्टी सभापति र देउवालाई काम गर्न दिनुपर्ने उनको भनाइ छ । केन्द्रीय सदस्य प्रकाश रसाइलीले भ्रष्टाचारको कुरा सुन्ने बित्तिकै पार्टीले मुख थुन्ने गरेको टिप्पणी गरे । पार्टीको जारी केन्द्रीय समितिको बैठकमा आफ्नो धारणा राख्दै उनले भ्रष्टाचार विरोधी साताव्यापी अभियान चलाउनुपर्ने उल्लेख गरे ।
