काठमाडौं । रामेछापको मन्थली नगरपालिका–६ भलुवाजोरस्थित बोक्से पहरामा जिप दुर्घटना हुँदा एक महिलाको मृत्यु भएको छ भने एक जना घाइते भएका छन् ।
आइतबार बिहान सदरमुकाम मन्थलीबाट हेटौँडा जाँदै गरेको निजी स्कारपियो मन्थली–खुर्कोट सडक खण्डको बोक्से पहराबाट तामाकोशी नदीमा खसेको हो ।
मृत्यु हुनेमा मन्थली नगरपालिका-११ बस्ने ४१ वर्षीया राधा कार्की चौहान रहेकी छन् । उनको घटनास्थलमानै मृत्यु भएको प्रहरीले जनाएको छ । दुर्घटनामा राधाका श्रीमान् ४६ वर्षीय उत्तम चौहान घाइते भएका छन् ।
घाइते उत्तमको सामुदायिक अस्पताल रामेछापमा प्राथमिक उपचार गरेर थप उपचारका लागि काठमाडौं ल्याइएको जिल्ला प्रहरी कार्यालय रामेछापले जनाएको छ ।
