नेपाल राष्ट्र बैंकले आज मौद्रिक नीति ल्याउने तयारी गरेको छ । मौद्रिक नीति पारित गर्न राष्ट्र बैंक सञ्चालक समितिको बैठक बोलाइएको छ । बैठकले नीतिलाई अन्तिम रुप दिएपछि दिउसो सार्वजनिक गरिने केन्द्रीय बैंकले जनाएको छ । उत्पादनमूलक क्षेत्रमा कर्जा प्रवाह गर्ने गरी नीति ल्याउने राष्ट्र बैंकको तयारी छ । मूल्यवृद्धि नियन्त्रण गर्ने र बाह्य क्षेत्र व्यवस्थापन हुने गरी चालु आर्थिक वर्षको मौद्रिक नीति जारी हुने सम्भावना छ । अर्थतन्त्रमा आएको शिथिलता हटाई आर्थिक गतिविधि चलायमान बनाउन, निष्क्रिय कर्जा र गैरव्यवसायिक गतिविधि बढिरहेको सन्दर्भमा वित्तीय स्थायित्व कायम राख्न मौद्रिक नीतिले जोड दिने बताइएको छ । निजी क्षेत्रले शेयर बजारमा एक व्यक्तिले १२ करोडभन्दा बढी ऋण लिन नपाइने राष्ट्र बैंकको व्यवस्था खारेज गर्नुपर्ने, घरजग्गा, सेयर र सवारी साधनको कर्जामा लाग्दै आएको जोखिम भार १ सय ५० प्रतिशतलाई घटाएर १ सय प्रतिशत मात्रै कायम गर्नुपर्ने माग गरेका छन् ।
