पाल्पा । नेपाल अंग्रेज युद्धको सम्झनामा आज पाल्पाको तानसेनमा भगवती रथयात्रा निकालिदै छ ।
आज तानसेन भगवतीटोलमा अवस्थित मन्दिरबाट रथयात्रा शुुरु हुनेछ । भगवतीलाई नवमीका दिन नगरपरिक्रमा गराउनुका साथै रथलाई तीन पटकसम्म मन्दिर घुमाउने प्रचलन छ ।
नेपाल अंग्रेज युद्धमा तत्कालीन कर्णेल उजीरसिंह थापाले नुवाकोट जितगढी किल्ला विजयी गरेको सम्झनामा भगवतीको खटयात्रा २०६ वर्षदेखि निरन्तर निकालिदै आएको छ ।
राष्ट्रियतासँग जोडिएको रणउजिरेश्वरी भगवतीको तत्कालीन पाल्पाका तैनाथवाला कर्णेल उजीरसिंह थापाले ब्रिटिस साम्राज्यको आक्रमणबाट पाल्पाको नुवाकोट जीतगढीमा जोगाएको सम्झनामा खटयात्रा निकालिदै आएको छ ।
तत्कालीन नेपाली सेनाका पाल्पा कमाण्डर कर्णेल उजिरसिंह थापाले युद्धमा जानुअघि युद्ध जितेमा तीनतले मन्दिर बनाइ भगवतीको सिन्दुरजात्रा गर्ने भाकल गरेको किंवदन्ती छ । युद्धमा विजयी भएपछि कर्णेल थापाले विसं १८७७ देखि कृष्ण जन्माष्टमीको भोलिपल्ट विजय उत्सवस्वरुप भगवती जात्रा मनाउन थालेको र सोही परम्परा हालसम्म चल्दै आएको हो ।
जात्राका अवसरमा प्रदेश सरकारले आज पाल्पामा सार्वजनिक बिदासमेत दिएको छ ।
