जुनार नपाक्दै कुहिन थालेपछि किसान चिन्तित

सिन्धुली। देशकै सवैभन्दा बढी जुनार उत्पादन हुने सिन्धुली जिल्लाका किसानहरु नपाक्दै जुनार कुहिन थालेपछि चिन्तित बनेका छन् । 
सिन्धुली जिल्लाको गोलञ्जोर गाउँपालिकाका विभिन्न जुनार बगैचामा नपाक्दै वगैचामै जुनार कुहिएर झर्न थालेका छन् । यसवर्ष  बोटमा लटरम्म फलेका जुनारका फल टिपेर बिक्रीका लागि बजार पठाउने बेलामा दिनहु कुहिएर भुईमा झर्न थालेपछि जुनार किसानहरुले रोगको पहिचान गरी समस्या समाधान गरिदिन सरकारसँग अनुरोध गरेको छ । जुनारमा देखिएको समस्या समाधान गर्न राष्ट्रिय कृषि आधुनिकीकरण कार्यक्रम, कार्यक्रम कार्यान्वयन एकाई, सिन्धुली र गोलञ्जोर गाउँपालिका कृषि विकास शाखाको संयुक्त टोलीले जुनार पकेट क्षेत्र आलेगाउ, माझकुभिण्डे र मालिङेका १५ जना कृषकका जुनार बगैंचाको स्थलगत अवलोकन गरेको छ । राष्ट्रिय कृषि आधुनिकीकरण कार्यक्रम, कार्यक्रम कार्यान्वयन एकाई, सिन्धुलीका प्रमुख याम कुमार श्रेष्ठकाअनुसार जुनारको फल कुहिएर भुईमा झेरको स्थलगत प्रारम्भिक विश्लेषण गर्दा ढुसीजन्य रोग हुन सक्ने अनुमान गरिएको छ । रोगको थप अनुसन्धान र पुष्टि गर्न फलको नमूना बुधबार नेपाल कृषि अनुसन्धान परिषद् (नार्क) पठाइएको छ । गोलञ्जोर गाउपालिका केही क्षेत्रको जुनार बगैचामा रोग देखिन थालेपनि अन्यत्र स्थानको जुनार बगैचामा भने विगतका वर्षहरुमा देखिएका रोगहरु समेत नियन्त्रण हुदै गएको राष्ट्रिय कृषि आधुनिकीकरण कार्यक्रम, कार्यक्रम कार्यान्वयन एकाइले जनाएको छ ।