फिफा महिला विश्वकपको सहआयोजक अस्ट्रेलियाका खेलाडीले विश्वकपको पुरस्कार राशीमा विभेद भएको भन्दै फिफाको आलोचना गरेका छन् । प्रतियोगिता सुरु हुन दुई दिन बाँकी हुँदा अस्ट्रेलियन टिमका सबै २३ महिला खेलाडीले भिडियो पोस्ट गर्दै असमान पुरस्कार राशीमा विरोध जनाएका हुन । उनीहरुको अभियानलाई अस्ट्रेलियन प्रोफेसनल प्लेयर्स युनियनले समेत साथ दिएको छ । इंग्ल्यान्ड, क्यानडा, दक्षिण अफ्रिका, नाइजेरियालगायतका महिला खेलाडीले समान पारिश्रमिक र पुरस्कारको माग गर्दै फुटबल संघविरुद्ध आन्दोलन गरिरहेका छन् । महिला र पुरुष विश्वकप जित्ने टिमले पाउने पुरस्कार राशीमा ठूलो अन्तर छ । फिफाले अझै पनि पुरुषको तुलनामा महिलालाई दिइने पुरस्कार राशी एक तिहाइ मात्र रहेको खेलाडीहरुको गुनासो छ । गत नोभेम्बर–डिसेम्बरमा कतारमा भएको पुरुष विश्वकपको पुरस्कार राशी ४ सय ४० मिलियन डलर थियो ।आगामी साउन ४ गतेदेखि सुरु हुने महिला विश्वकपको पुरस्कार राशी १ सय १० मिलियन डलर छ । जुन अघिल्लो संस्करणभन्दा तीन सय प्रतिशतले बढी हो । फिफाले सन् २०२६ र २०२७ को विश्वकपमा भने महिला पुरुष दुवैलाई समान पुरस्कार दिने योजना बनाएको जनाएको छ । फुटबलको सबैभन्दा ठूलो प्रतियोगिता विश्वकपमा यो पटक ३२ राष्ट्रका ७ सय ३६ खेलाडीले आफ्नो देशको प्रतिनिधित्व गर्दैछन् ।
