बागलुङ । बागलुङ बजारमा नेवारी समुदायका युवाहरूले यो वर्ष पनि पुरानो संस्कृति रोपाइँ जात्रालाई निरन्तरता दिएका छन् ।
शहरीकरणसँगै बागलुङ बजारमा बसोबास गर्दै आएका नेवार समुदाय काठमाडौं पोखरा लगायतका शहरहरूमा बसाइँसराइ गरेर गएपछि लोप हुने अवस्थामा पुगेको संस्कृतिलाई युवा पुस्ताले निरन्तरता दिएका हुन् ।
महिलाको भेषमा सजिएका पुरुषले असारे गीत गाएर परम्परा लाई निरन्तरता दिँदै संस्कृति जोगाउने काम गरिरहेको नेपाल भाषा मंका खलले जनाएको छ ।
बागलुङमा नेवार समुदायले प्रदर्शन गर्ने भदौरे रोपाइ नाचको रौनकता छुट्टै हुने गरेपनि पछिल्लो समय लोप हुँदै गएको छ । बागलुङका नेवार समुदाय बाहिर गएको कारणले यस्तो अवस्था आएको स्थानीयको ठम्याई छ ।
बागलुङको रोपाइँ जात्रा २३९ वर्षभन्दा पुरानो रहेको नेवारी समुदायका जानकार बताउँछन् । शिखारी, थेत्तर र नागनागिनी नाच बढी खर्चिलो भएकाले यसअघि नै देखाउन छाडिसकिएको छ ।
