काठमाडौ । जल तथा मौसम विज्ञान विभागले असोज १७ गतेदेखि २० गतेसम्म मुलुकका विभिन्न स्थानमा भारी वर्षा हुने पूर्वानुमान गरेको छ । यसै क्रममा राष्ट्रिय विपद् जोखिम न्यूनीकरण तथा व्यवस्थापन प्राधिकरणले उच्च सतर्कता अपनाउन सबैलाई आग्रह गरेको छ ।
प्राधिकरणका अनुसार कोशी, मधेश, बागमती, गण्डकी, लुम्बिनी, कर्णाली र सुदूरपश्चिम प्रदेशका विभिन्न नदी–खोलामा पानीको सतह बढ्ने र बाढीको जोखिम रहने भएकाले सतर्क रहन सुझाइएको छ । नारायणी, कर्णाली, महाकाली लगायतका ठूला नदीमा जलस्तर बढ्ने सम्भावना रहेकाले नदी किनार तथा तटीय क्षेत्रमा बसोबास गर्ने बासिन्दालाई विशेष सतर्कता अपनाउन अनुरोध गरिएको छ ।
बाढी–पहिरो र डुबानको उच्च जोखिम रहेकाले सम्भावित प्रभावित क्षेत्रका नागरिकलाई सुरक्षित स्थानतर्फ सर्न, अत्यावश्यक सामग्री सुरक्षित राख्न, आपत्कालीन निकास मार्गको जानकारी राख्न तथा सूचना–सन्देशलाई निरन्तर ध्यान दिन प्राधिकरणले आग्रह गरेको छ ।
यस्तै, सडक सञ्जाल, पुल, खानेपानी, बिजुली लगायतका पूर्वाधारमा क्षति पु¥याउन सक्ने सम्भावना भएकाले सम्बन्धित निकायलाई अग्रिम तयारी र तत्काल प्रतिकार्यमा जुट्न निर्देशन दिइएको छ ।
प्राधिकरणले आपत्कालीन उद्धार, राहत तथा सहयोगमा संलग्न संघ–संस्थाहरूसँग निरन्तर समन्वयमा रहन जिल्ला विपद् व्यवस्थापन समिति र स्थानीय तहलाई पनि सतर्क रहन आग्रह गरेको छ ।
