सातौं संस्करणको महिला तथा पुरुष क्लब लिग भलिबलमा महिला तर्फ नेपाल एपीएफ क्लबले लगातार तेस्रो जित दर्ता गरेको छ । त्रिपरेश्वरस्थित राष्ट्रिय खेलकुद परिषदको कर्भड हलमा भएको आज भएको पहिलो खेलमा एभरेष्ट भलिबल क्लबलाई पराजित गर्दै विभागीय टोली नेपाल एपीएफले फाइनल नजिक पुगेको हो । उपाधी दावेदार मानिएको एपीएफले एभरेष्टलाई ३–० को सोझो सेटमा पराजित गरेको हो । एपीएफले २५–९, २५–१२, २५–१२ ले तीनै सेट जितेर खेल आफ्नो पक्षमा पारेको हो । एपीएफ ३ खेलमा ८ अंकका साथ दोस्रो स्थानमा रहेको छ । एपीएफले पहिलो खेलमा अर्को विभागीय टोली त्रिभुवन आर्मीलाई र दोस्रो खेलमा गण्डकी प्रदेशलाई पराजित गरेको थियो । एभरेष्टको भने यो लगातार तेस्रो हार हो । आज नै महिला तर्फ थप एक खेल र पुरुष तर्फ तीन खेल हुने तालिका छ । प्रतियोगितामा महिला तर्फ छ तथा पुरुष तर्फ सात टोलीको सहभागीता रहेको छ । महिला र पुरुष तर्फ शीर्ष दुईमा रहने टोलीबीच फाइनल खेल हुनेछ ।।
