पर्वतमा जनप्रतिनिधिहरुले कालिगण्डकी नदीमा भैरहेको दोहन रोक्न माग गर्दै प्रशासनको ध्यानाकर्षण गराएका छन ।
प्रहरी लगायतकै मिलेमतोमा दोहन भैरहेको भन्दै फलेवास नगरपालिका वडानम्बर चारका वडाध्यक्ष अच्यूत तिवारी नेतृत्वको टोलीले प्रशासनको ध्यानाकर्षण गराएको हो । असार साउन भदौ महिनामा सरकारले नदीमा उत्खननमा रोक लगाएपनि पर्वतमा भने दिन रात नदीजन्य सामाग्री उत्खनन भैरहेको जनप्रतिनिधिको भनाइ छ ।
ज्ञापन पत्र बुझ्दै प्रमुख जिल्ला अधिकारी हरिप्रसाद घिमिरेले तस्करी र अबैध दोहन रोक्न सक्दो पहल गर्ने प्रतिबद्धता जनाए । जिल्ला प्रहरी कार्यालयले भने नदी दोहन रोक्न माग गरिएको ध्यानाकर्षण पत्र बुझ्न अस्वीकार गरेको छ ।
खोलामा आधुनिक उपकरण प्रयोग गरेर उत्खनन गर्न नपाउने नियम भएपनि पर्वतमा त्यसको कार्यान्वयन भएको छैन । केही दिनअघि प्रशासनले अबैध रुपमा उत्खनन गरिएका सामाग्री जिल्ला समन्वय समिति नेतृत्वको अनुगमन टोलीले जफत गरेको थियो ।
