अर्घाखाँची । अर्घाखाँचीका एक जना कृषकले आगोले जलेको सिंहदरबार बनाउन एक लाख आर्थिक सहयोग गरेका छन् ।
शितगंगा नगरपालिका–२ का किसान तुलसीराम अधिकारीले “फेरि यस्तो नहोस्, म बनाउँछु मेरो सिंहदरबार, म बनाउँछु मेरो देश, हामी बनाउँछौँ हाम्रो नेपाल“ भन्ने भावनासहित प्रधानमन्त्री दैवी प्रकोप सहयोग कोषमा १ लाख १ सय जम्मा गरेका हुन् ।
उनले कृषि कर्मबाट कमाएको आम्दानी यसै कोषमा अर्पण गरेका हुन् । सिंहदरबार जल्दा आस्था पनि जलेको भन्दै उनले सबैले सकेको सहयोग गर्नुपर्ने बताए ।
प्रमुख जिल्ला अधिकारी गोपाल प्रसाद अर्यालले कृषि आम्दानीबाट आएको यो रकम पुनर्निर्माणमा ठूलो टेवा पुग्ने बताए ।
रकम जम्मा पश्चात अधिकारीले भौचर प्रमुख जिल्ला अधिकारीलाई हस्तान्तरण गरेका थिए ।
