काठमाडौं । सर्वोच्च अदालतका न्यायाधीश र विवादित व्यक्तिहरूबीच भएको भनिएको सम्पर्क तथा संवाद सार्वजनिक भएपछि न्यायपालिकाको निष्पक्षता र संस्थागत विश्वसनीयतामाथि बहस चर्किएको छ।
न्यायाधीश हरिप्रसाद फुयाँल र इनाम सापकोटाबीच भएको भनिएका ह्वाट्सएप संवाद सार्वजनिक भएपछि विवाद थप चुलिएको हो।
यस विषयमा शुक्रबार सर्वोच्च अदालतको पूर्ण बैठकसमेत बसेको थियो। बैठकमा न्यायाधीशहरूसँग सम्बन्धित सम्पर्क, प्रधानन्यायाधीशमाथि उठेका आरोप, संवैधानिक इजलासको विवाद र न्यायिक आचारसंहितासम्बन्धी विषयमा छलफल भएको सार्वजनिक विवरणमा उल्लेख छ।
नेपाल बार एसोसिएसनले पनि घटनाको निष्पक्ष, स्वतन्त्र र समयबद्ध छानबिन गर्न माग गरेको छ। न्यायपालिकाको स्वतन्त्रता र विश्वसनीयता कायम राख्न आरोपको निष्पक्ष छानबिन तथा कानुनी प्रक्रियाको पालना हुनुपर्ने आवाज उठिरहेको छ। यद्यपि सार्वजनिक भएका आरोपलाई अनुसन्धानबाट पुष्टि नभएसम्म दोष प्रमाणित भएको मान्न मिल्दैन।
