काठमाडौं । नेपाल प्रिमियर लिग (एनपीएल)को सुरक्षाका लागि दैनिक १ हजार भन्दा बढी प्रहरी परिचालन हुने भएका छन् ।
एनपीएलकै लागि भनेर जिल्ला प्रहरी परिसर काठमाडौंले सुरक्षा योजना बनाएर काम सुरू गरेको छ । जिल्ला प्रहरी परिसर काठमाडौंका एसएसपी दिलिप घिमिरेका अनुसार, हिजो शनिबार मात्रै सीडीओसहितको टोली कीर्तिपुरस्थित त्रिवि क्रिकेट स्टेडियम पुगेर अवलोकन गरिएको छ ।
प्रहरीले एनपीएलका लागि विभिन्न भागमा वर्गीकरण गरेर सुरक्षा तय गरेको छ । खेलाडीको सुरक्षादेखि, उनीहरू बस्ने आठ वटा होटलको सुरक्षा, होटलबाट स्टेडियम जाँदाआउँदाको सुरक्षा, ट्राफिक व्यवस्थापन, खेल भएको बेला स्टेडियम तथा दर्शकको सुरक्षा गरी वर्गीकरण गरेर सुरक्षा प्रदान गरिने एसएसपी घिमिरेले बताए ।
खेलको उद्घाटन र समापनमा भीआईपी, भीभीआईपी सवारी हुने भएकाले उनीहरूको सुरक्षा पनि विशेष ख्याल गर्नेगरी व्यवस्था मिलाइएको उनले बताए । यी सबै सुरक्षाका लागि दैनिक एक हजार प्रहरी परिचालन हुने बताइएको छ । यसमा सादा पोशाकका प्रहरी पनि समेटिनेछन् ।
त्यस्तै सीसीटीभीबाट निगरानी गर्नेदेखि ड्रोनमार्फत निगरानी गर्ने र डग स्नीफिङ समेत गरिने प्रहरीले बताएको छ । अहिले स्टेडियम वरपर सीसीक्यामेरा समेत जडान गरिएको त्यहाँको निगरानी स्टेडियममै खटिएका प्रहरीले गर्नेछन् ।
अन्यत्रको सीसीक्यामेराका निगरानी भने प्रहरीको सीसीक्यामेरा कन्ट्रोल रुमबाट हुनेछ । नेपाल प्रहरी बाहेक बाह्य सुरक्षामा सशस्त्र प्रहरी पनि खटिने बताइएको छ ।
