काभ्रेपलाञ्चोक । काभ्रेपलाञ्चोकको वि.पी. राजमार्ग र अरनिको राजमार्गमा सडक दुर्घटनाको जोखिम कम गर्न सचेतनामूलक होर्डिङ बोर्ड राख्न थालिएको छ ।
जिल्ला ट्राफिक प्रहरी कार्यालय काभ्रेको पहलमा पहिरो र अन्य जोखिमपूर्ण स्थानहरूमा सूचना र सतर्कता सन्देशसहितको बोर्डहरू राख्न थालिएको हो ।
विपी राजमार्गमा २५ र अरनिको राजमार्गका ५ स्थानमा होर्डिङ बोर्डहरू राखिने ट्राफिक प्रहरी कार्यालयले जनाएको छ । बोर्ड राख्ने अभियानमा जिल्ला प्रशासन कार्यालय, जिल्ला प्रहरी कार्यालय काभ्रेपलाञ्चोक र डिभिजन सडक कार्यालय भक्तपुरले सहकार्य गरेका हुन् ।
होर्डिङ बोर्डहरु सडक सुरक्षाबारे सचेतना बढाउन र दुर्घटना न्यूनिकरणमा प्रभावकारी हुने अपेक्षा गरिएको छ । सचेतनामूलक सन्देशहरू चालक र यात्रु दुवैका लागि सुरक्षामूलक सावधानी अपनाउन सहयोग हुने ट्राफिक प्रहरीको विश्वास छ ।
