काठमाडौं । यमनी हुथी विद्रोहीको आक्रमणबाट साउदी अरबमा विमानस्थलमा पार्किङ गरी राखिएको एउटा जहाजमा क्षति पुगेको छ।
बिहीबार साउदी राजधानी रियादको विमानस्थलमा पार्किङ गरी राखिएको यात्रुवाहक विमानमा आगलागी भएको अधिकारीहरूलाई उद्धृत गर्दै अन्तर्राष्ट्रिय समाचार संस्था रोयटर्सले लेखेको छ।
हुथीले प्रहार गरेको मिसाइल हवाई प्रतिरक्षा प्रणालीले आकाशमै रोक्ने क्रममा त्यसबाट खसेको अवशेष लागेर विमानमा आगलागी भएको हो।
आगलागी भएको विमान साउदी सरकारको स्वामित्वमा रहेको साउदीया एयरलाइन्सको विमान रहेको पनि रोयटर्सले लेखेको छ। विमानमा ठूलो क्षति भएको छ। उक्त विमानमा यात्रु नरहेको पनि बताइएको छ।
हुथीले बुधबारदेखि साउदीका विमानस्थलहरूलाई लक्ष्य गरी हवाई हमला गरिरहेका छन्। बुधबारदेखिको हमलामा कम्तिमा ३ जनाको मृत्यु र ३६ जनासम्म घाइते भएको रिपोर्ट सार्वजनिक भएका थिए। हुथीले साउदीको ऊर्जा केन्द्रलाई पनि निशाना बनाउने चेतावनी दिएको छ। उनीहरूले त्यस्ता ऊर्जा केन्द्रमा काम गर्ने कर्मचारीलाई त्यहाँबाट टाढा रहन आग्रह गरेका छन्।
हुथी आक्रमणका कारण साउदी अरबमा हवाई सेवा पनि प्रभावित भएको छ। जर्मनीको लुफ्थान्सा र भारतको एयर इन्डियाले रियादका लागि हुने उडान स्थगित गरेका छन्।
उड्डयनसम्बन्धी तथ्यांक संकलन गर्ने कम्पनी सिरियमका अनुसार बिहीबार नेपाली समयअनुसार नभई विश्वव्यापी समन्वित समय ९जीएमटी० अनुसार दिउँसो ३ बजेसम्म रियाद विमानस्थलबाट हुने झन्डै आधा उडान रद्द भएका थिए।
साउदी अरबका विभिन्न विमानस्थलबाट शुक्रबारका लागि थप ३१ उडान रद्द हुने अनुमान गरिएको थियो। साउदी अधिकारीहरूका अनुसार मिसाइल रोक्ने क्रममा खसेका अवशेष रियादस्थित एक बालविकास केन्द्र र स्वास्थ्य उपचार केन्द्रमा पनि लागेका छन्।
यमनको गृहयुद्धमा साउदी अरबले अन्तर्राष्ट्रिय मान्यता प्राप्त सरकारलाई समर्थन गर्दै आएको छ। हुथी विद्रोहीले भने त्यसैको विरोधमा साउदी अरबलाई निशाना बनाएको बताएका छन्।
सन् २०२२ मा युद्धविराम भएपछि केही शान्त भएको यमनको द्वन्द्व पछिल्ला साताहरूमा फेरि चर्किएको छ। हुथीहरूले रेड सीको तटीय क्षेत्रमा आफ्नो नियन्त्रण विस्तार गरेपछि साउदी समर्थित सरकारी सेनाले प्रत्याक्रमण थालेको छ।
युद्ध चर्किएसँगै साउदी अरबले सहयोगी मुलुकसँग सैन्य सहयोग मागिरहेको छ। टर्कीले साउदी अरबलाई मुख्यतः रक्षात्मक तथा प्राविधिक सहयोग पठाउने जनाएको छ।
सिरियाले पनि साउदी अरबलाई सहयोग गर्न सकिने विकल्पबारे विचार गरिरहेको अमेरिकी र सिरियाली रक्षा अधिकारीलाई उद्धृत गर्दै रोयटर्सले जनाएको छ।
यमनको द्वन्द्व पुनः चर्किँदा पछिल्लो समय करिब दुई लाख मानिस विस्थापित भएको रोयटर्सले जनाएको छ। साउदी अरबका विमानस्थल, ऊर्जा केन्द्र र रेड सीको महत्त्वपूर्ण समुद्री मार्गमा बढ्दो जोखिमले क्षेत्रीय सुरक्षा र हवाई यातायातमा थप दबाब सिर्जना गरेको छ।
