पर्वत । पर्वतमा आयुर्वेदिक चिकत्सालयमा सेवा लिने बिरामीहरुको दर बढ्न थालेको छ ।
पछिल्ला वर्षहरुमा मृगौला, क्यान्सर ,पत्थरी , थाईराईड , मधुमेह जस्ता नसर्ने रोगहरु मानिसमा बढ्दो रुपमा देखा पर्न थालेसँगै आयुर्वेदिक औषधिको सेवन गर्ने दर बढेको हो ।
जिवनशैलीसँग सम्बन्धीत, तनाव थकानका लक्षण भएका बिरामी उपचारका लागि आउने क्रम बढेको चिकित्सालयले जनाएको छ । सात्विक आहार विहारको लागिपनि आयुर्वेदिक चिकित्सालयमा बिरामी पुग्ने क्रम बढेको छ ।
गत वर्ष पर्वतका चार आयुर्वेदिक औषधालयबाट १५ हजार ८ सय ७६ जनाले सेवा लिएका छन् । त्यस्तै, प्रदेश आयुर्वेदिक चिकित्सालय मार्फत ६ हजार भन्दा बढीले आयुर्वेदिक सेवा लिएको तथ्यांक छ ।
यहाँ उपचार लिन छिमेकी जिल्ला बागलुङ, गुल्मीका सेवाग्राही समेत पुग्ने गरेका छन् । औषधालयले २३ प्रकारका जडीबुटीजन्य औषधि उपलब्ध गराउँदै आएको छ ।
