काठमाडौं । भारत–पाकिस्तान तनावका कारण रोकिएको इण्डियन प्रिमियर लिग (आईपीएल) का खेलहरू आज देखि फेरि शुरु हुँदैछ ।
भारत र पाकिस्तानबीच युद्धविराम भएपछि भारतीय क्रिकेट नियन्त्रण बोर्ड (बीसीसीआई) ले बाँकी खेलहरू आजबाट शुरु गरेको हो ।
आईपीएल पुनस् शुरु हुँदाको पहिलो खेलमा रोयल च्यालेन्जर्स बेंगलुरु र कोलकाता नाइट राइडर्स खेल्दै छन् । खेल बेलुका पौने ८ बजेदेखि बेंगलुरुस्थित एम चिन्नास्वामी रंगशालामा शुरु हुनेछ ।
भारत–पाकिस्तान तनावका कारण बीसीसीआईको आकस्मिक बैठक बसेर आईपीएल एक साताका लागि स्थगित गर्ने निर्णय भएको थियो । पञ्जाब किंग्स र दिल्ली क्यापिटल्स बीचको खेल अनिर्णीत भएर रोकिएको थियो । तर, अब बीसीसीआईले यो खेल फेरि आयोजना गर्ने निर्णय गरेको छ ।
आईपीएलको प्लेअफ दौडबाट ३ टोली यसअघि नै आउट भइसकेका छन् भने ७ टिम प्लेअफ होडमा रहेका छन् । अंकतालिकामा गुजरात टाइटन्स ११ खेलमा १६ अंकसहित शीर्ष स्थानमा छ । बेंगलुरु समान खेलमा समान अंकसहित दोस्रो स्थानमा छ भने पञ्जाब किङ्स ११ खेलमा १५ अंकसहित तेस्रो स्थानमा, मुम्बई १२ खेलमा १४ अंकसहित चौथो स्थानमा छ ।
यस्तै दिल्ली ११ खेलमा १३ अंकसहित पाँचौं स्थानमा, कोलकाता १२ खेलमा ११ अंकसहित छैटौं स्थानमा र लखनउ ११ खेलमा १० अंकसहित सातौं स्थानमा छ ।
