म्याग्दी । म्याग्दीको अन्नपूर्ण गाउँपालिका–७ दोसल्लेमा शुरु भएको १२ वर्षपछि खेलमैदान निर्माण योजनाले पूर्णता पाएको छ ।
ओरेन्ज युवा क्लबले २०७० सालमा पाखो सम्याएर शुुरु गरेको खेलमैदान निर्माणकार्य यो वर्ष पूरा भएको हो । स्थानीय युवाहरूको अगुवाइमा समुदायस्तरबाट शुुरु भएको खेलमैदान निर्माण सम्पन्न गर्न पर्याप्त आर्थिक स्रोत नहुँदा १२ वर्ष लागेको हो ।
एकतीस मिटर लम्बाइ र १६ मिटर चौडाइको खेलमैदानमा बास्केटबल र भलिबल खेल सञ्चालन गर्न सकिने छ । चालु आर्थिक वर्षमा गाउँपालिकाले विनियोजन गरेको १० लाख र एक लाख १८ हजार १४८ बराबरको श्रमदानमा खेलमैदानको बाहिरी भाग र स्टेज ढलान गरिएको उपभोक्ता समितिले जनाएको छ ।
अन्नपूूर्ण गाउँपालिकाबाट ३४ लाख र गण्डकी प्रदेश सरकारबाट पाँच लाख गरी ३९ लाख विनियोजन भएको थियो ।
