काठमाडौं : नेपाल आयल निगमले सरकारलाई पत्र लेख्दै आर्थिक संकटमा परेको जानकारी गराएको छ ।
विश्व बजारमा तेलको मूल्य लगातार बढिरहेकाले त्यसको भार निगमलाई परेको भन्दै तत्काल निकास दिन सरकारसँग आग्रह गरेको हो ।
प्रधानमन्त्री तथा मन्त्रिपरिषद्को कार्यालय र उद्योग वाणिज्य तथा आपूर्ति मन्त्रालयको ध्यानाकर्षण गराउँदै निगमले आर्थिक जोहो गरिदिन आग्रह गरेको छ ।
तेलको खपत लगातार बढिरहेको, विश्व बजारमा मूल्य आकाशिएको र निगमको घाटा चुलिमा पुगेकाले सरकारको ध्यानाकर्षण गराएको आयोगले जनाएको छ ।
सरकारले तत्काल आर्थिक जोहो नगरिदिए तेल किन्नै नसक्ने अवस्थामा पुग्ने निगमको चेतावनी दिएको छ ।
आयल निगमले यसअघि जग्गा धितो राखेर बैंक तथा वित्तीय संस्थाबाट कर्जा लिने बताएको थियो ।
निगमले भारतलाई ३० अर्ब रूपैयाँ तिर्न बाँकी रहेको छ । निगमले चालु आर्थिक वर्षको अन्त्यसम्ममा ५५ अर्ब रुपैयाँ नोक्सानीमा जाने देखिएको उल्लेख गरेको छ ।
