ADVERTISING

कानूनअनुसार नै गोकर्ण रिसोर्टको सम्झौता अवधि थप गरिएको हो

कानूनअनुसार नै गोकर्ण रिसोर्टको सम्झौता अवधि थप गरिएको हो : उपप्रधानमन्त्री पोखरेल

Breaking News

काठमाडौं : गोकर्ण फरेस्ट रिसोर्टसँगको पुरानो सम्झौता अवधि सकिनुभन्दा साढे पाँच वर्षमा सबा ४ करोडभन्दा बढी भाडा आउने गरी सम्झौता अवधि बढाइएको सरकारले स्वीकार गरेको छ । आजको राष्ट्रिय सभा बैठकमा सांसदहरुले उठाएका प्रश्नको जवाफ दिदै उपप्रधान तथा रक्षामन्त्री इश्वर पोखरेलले नेपाल ट्रस्टको सिफारिसमा गोकर्ण फरेष्टको समय २५ वर्ष थप गरिएको बताएका हुन् ।

ट्रष्ट सञ्चालक समितिका अध्यक्ष समेत रहेका पोखरेलले राष्ट्रलाई फाइदा हुने देखिएमा अवधि समाप्त हुनु अघि सम्झौता अवधि थप गर्न सक्ने कानूनी ब्यवस्था अनुसार नै म्याद थप गरेको जिकिर समेत गरे ।

मन्त्री पोखरेलले यती होल्डिङ्सले २९ करोड लगानीमा ४८ वटा सुविधा सम्पन्न रुम सहितको ४ सय जना अट्ने सभा हल बनाउने निश्चित गरेपछि समय थप भएको पनि स्पष्ट पारे ।

उनले नेपाल ट्रस्ट मातहतको सार्वजनिक सम्पत्तिको वास्तविक लेखाजोखा गरी सरकारले छिट्टै श्वेत पत्र जारी गर्ने प्रतिवद्धता पनि जनाए । राष्ट्रिय सभाका सदस्यहरुले भने सरकारले विद्यमान कानून मिचेर सम्झौता गरेको भन्दै सरकारका मन्त्री आर्थिक लाभमा लागेको आरोप लगाए ।

ऐनमै नभएको ब्यवस्थामा टेकेर सम्झौता गरिएको सांसदहरुको आरोप छ । उनीहरुले दरबारमार्गस्थित नेपाल ट्रस्टको कार्यालयकै जग्गा पनि सरकारले गैरकानूनी रुपमा भाडामा लगाएको आरोप लगाए ।

२०५२ सालमा यती होल्डिङ्ससँग सरकारले ३० बर्षे सम्झौता गरेको थियो । तर सम्झौता सकिनु पाँच बर्ष अघि सस्तो दररेटमा म्याद थप गरिएपछि त्यसको देशब्यापी विरोध हुँदै आएको छ ।