सन्दीप लामिछानेलाई क्यानले गर्‍यो कारबाही

काठमाडौं । नेपाल क्रिकेट संघ(क्यान) ले राष्ट्रिय क्रिकेट टोलीका लेगस्पिनर सन्दीप लामिछानेलाई कारबाही गरेको छ ।

क्यानको आचारसंहिताविरूद्ध सामाजिक सञ्जालमा लेखेको भन्दै लामिछानेलाई कारबाही गर्दै तीन ‘डिमेरिट अंक’ दिने निर्णय गरेको छ । डिमेरिट अंक भनेको कुनै खेलाडीले आचारसंहिताको उल्लंघन गर्दा दिइने अंक हो । 

लामिछानेलाई अब क्यानले आयोजना गर्ने एक खेलमा प्रतिबन्ध लगाइएको छ । साथै उनले क्यान, एसीसी र आईसीसी, खेलाडी, म्याच अफिसियल र टिमका बारेमा सार्वजनिक रूपमा टिप्पणी गर्न प्रतिबन्ध लगाइएको छ ।

सन्दीपले माघ पहिलो साता सकिएको जय ट्रफी एलिट कपमा अम्पायरको निर्णयमा असन्तुष्टि व्यक्त गरेका थिए । जनकपुरमा पौष २५ गते त्रिभुवन आर्मी क्लबविरूद्ध भएको खेलको विषयमा अम्पायरले गलत निर्णय गरेको भन्दै सामाजिक सञ्जालमा लेखेका थिए । उनले जय ट्रफीमा बागमती प्रदेशको कप्तानी गरेका थिए ।