गाजाको भग्नावशेष हटाउन ५ वर्ष लाग्ने

एजेन्सी । गाजामा रहेको भग्नावशेष हटाउन ५ वर्ष सम्म लग्ने प्यालेष्टिनी अधिकारीले बताएका छन् । 

पर्याप्त रकम र उपकरण उपलब्ध भएमा इजरायल सँगको द्वन्द्वका क्रममा गाजामा रहेको भग्नावशेष हटाउन तीन देखि ५ वर्ष लाग्न सक्ने प्यालेस्टिनी सार्वजनिक संरचना निर्माण तथा आवास मन्त्री अहेद बिसिसोले बताएका छन् । 

विस्फोटक पदार्थ पत्ता लगाउनका लागि स्रोत, कोष र विशेष उपकरणहरू सुरक्षित गर्न, र भग्नावशेष उठाउन, सामान छुट्टाउन र ढुवानी गर्न तीन देखि ५ वर्ष लाग्न सक्ने अनुमान गरिएको बिसिसोले प्यालेस्टिनी समाचार संस्था (वाफा) सँग बताएका हुन् ।  

उनले संयुक्त राष्ट्रसंघीय विकास कार्यक्रम (यू.एन.डी.पी.) लगायत विभिन्न संस्था सँग सडक खुलाउने र भग्नावशेष हटाउने प्रक्रियामा समन्वयका लागि आफ्नो मन्त्रालयले काम गरिरहेको बताए । 

अर्को चरणमा विद्यालय, अस्पताल र मस्जिद सहित १५० वटा सार्वजनिक भवनको भग्नावशेष हटाउने र सडक पुनः सञ्चालन गर्ने विषयमा केन्द्रित हुने बिसिसोले बताए । 

“पेश गरेको दुई करोड ५० लाख क्षतिको स्थानीय बासिन्दाले पेश गरेको प्रतिवेदनमा आधारित विस्तृत अध्ययन पूरा भएको छ,” बिसिसोले भने ।  

वेस्ट बैङ्क र गाजा दुवैको स्थितिलाई सम्बोधन गर्न एउटा कार्य दल स्थापना गरिएको छ । बिसिसोले भने, “प्रारम्भिक जानकारी अनुसार इजरायली आक्रमणका कारण लगभग चार लाख आवासीय एकाइहरू पूर्ण वा आंशिक रूपमा नष्ट भएका छन् । दाताहरूको समन्वयमा दुई लाख नयाँ एकाईहरूको निर्माण गरिनुपर्ने आवश्यकता देखिएको छ ।” 

आंशिक रुपमा क्षति भएका घरहरूको मर्मत सम्भार गर्न र घरहरू पूर्ण रुपमा ध्वस्त भएकाहरूलाई अस्थायी आवास उपलब्ध गराउन साझेदारहरू सँग मिलेर काम गर्ने मन्त्रालयको योजना छ ।

उनका अनुसार आफन्त सँग बस्ने परिवारले आर्थिक क्षतिपूर्ति पाउनेछन् । संयुक्त राष्ट्रसङ्घको अनुमान अनुसार २० लाख भन्दा बढी जनसङ्ख्या रहेको गाजामा ५ करोड टन भन्दा बढी भग्नावशेष हटाउन आवश्यक छ र यसका लागि करिब एक अर्ब २० करोड अमेरिकी डलर को लागत लाग्नेछ । 

गाजा स्थित प्यालेष्टिनी सरकारी सञ्चार माध्यम वाफाको कार्यालयले युद्धविराम पछिको आफ्नो पहिलो मूल्याङ्कनमा गाजा पट्टीको ८८ प्रतिशत क्षेत्रमा क्षति पुगेको र प्रारम्भिक क्षति ३८ अर्ब डलर भन्दा बढी भएको अनुमान गरेको छ ।
रासस