लेखा समिति सभापतिका पूर्व स्वकीय सचिवविरुद्ध अदालतमा मुद्दा दर्ता

विराटनगर । सार्वजनिक लेखा समितिका सभापति ऋषिकेश पोखरेलका पूर्वस्वकीय सचिव अनिल कुमार पोखरेलविरुद्ध मुद्दा दायर भएको छ ।

जिल्ला सरकारी वकिलको कार्यालयले ठगी मुद्दामा जिल्ला अदालत मोरङमा बुधवार पोखरेलविरुद्ध मुद्दा दायर गरेको हो । सरकारी वकिलको कार्यालयले पोखरेलविरुद्ध ७ वर्षसम्म कैद र ७० हजार रुपैयाँसम्म जरिवानाको माग दाबी लिएर अभियोग दर्ता गराएको जनाइएको छ ।

अभियोग दर्ता भएपछि बिहीबार पोखरेलको बयान हुने र सोही दिन बयान सकिए थुनछेक बहस शुरु हुने बताइएको छ । थुनछेक बहसपछि अदालतले पुर्पक्षको लागि थुनामा पठाउने, धरौटीमा छोड्ने वा साधारण तारेखमा छोड्नेमध्ये एउटा आदेश दिनेछ ।

ठगी आरोपमा प्रहरीले उनलाई पौष २५ गते पक्राउ गरेको थियो । पोखरेलले एमबीबीएसमा नाम निकालिदिने भन्दै सप्तरीको अग्नीसाईर कृष्णासवरन गाउँपालिका–५ बकधुवाका बौआलाल चौधरीसँग ३८ लाख ८० हजार रुपैयाँ लिएको आरोप छ ।