मस्को गोलीकाण्डलाई लिएर रुस र युक्रेनबीच आरोप प्रत्यारोप

रुसका राष्ट्रपति भ्लादिमिर पुटिनले शनिबार मस्को कन्सर्ट हलमा कम्तीमा एक सय तेतिस जनाको ज्यान जाने गरी भएको ‘बर्बर आतङ्कवादी आक्रमण’ मा संलग्नलाई सजाय दिने प्रतिबद्धता जनाएका छन् ।  राष्ट्रका नाममासम्बोधन गर्दै राष्ट्रपति पुटिनले हमलाकारीको तुलना ‘नाजीहरू’ सँग गर्दै आक्रमण ‘अत्याचार, रुसका मानिसविरुद्धको हमला’ भएको बताएका हुन । पुटिनले आक्रमणबारे पहिलो सार्वजनिक टिप्पणीमा इस्लामिक स्टेटले लिएको जिम्मेवारीको दाबीको सन्दर्भलाई भने कुनै प्रतिक्रिया जनाएनन । ‘गोली हानी मानिसहरूको हत्या गर्ने सबैलाई फेला पारिएको जानकारी उनले दिएका छन । आक्रमणकारीहरु भाग्ने प्रयासमा युक्रेनतर्फ गइरहेको दाबी पनि पुटिनले गरेका छन । पुटिनले आज राष्ट्रिय शोक दिवस मनाउने घोषणा गरे । एफएसबी सुरक्षा सेवाले शनिबार आक्रमणका सिलसिलामा ११ जनालाई पक्राउ गरेको बताएको छ । शुक्रबार साँझ मस्कोको उत्तरी उपनगर क्रास्नोगोर्स्कमा रहेको क्रोकस सिटी हलमा बन्दुकधारीले आक्रमण गरी भवनमा आगो लगाएका थिए । यो करिब दुई दशकमा रुसमाथि सबैभन्दा घातक आक्रमण हो  । यसलाई इस्लामिक स्टेटले दाबी गरेको युरोपमा सबैभन्दा घातक आक्रमण मानिएको छ । आक्रमणमा १ सय ३३ जनाको मृत्यु भएको छ । रुसी अधिकारीहरूले मृतकको सङ्ख्या अझ बढ्ने अनुमान गर्दै १०० भन्दा धेरै घाइते अस्पतालमा रहेको बताएका छन् । आक्रमणपछि मुलुकभरका प्रमुख कार्यक्रम रद्द गरिएका छन् । रुस र पाराग्वेबीच मस्कोमा  तय भएको मैत्रिपूर्ण फुटबल पनि रद्द भएको छ यसैबीच, नेपाल सरकारले पनि मस्कोमा भएको आतंककारी आक्रमणको निन्दा गरेको छ । परराष्ट्र मन्त्रालयले प्रेस विज्ञप्ति जारी गर्दै मस्कोमा भएको आतंककारी हमलाप्रति दुःख व्यक्त गरेको हो ।