कर्णाली प्रदेश सरकारले तीन सातापछि पायो पुर्णता

कर्णाली मन्त्रिपरिषद्ले तीन सातापछि पूर्णता पाएको छ । चैत २७ गते नेकपा माओवादी केन्द्रको समर्थनमा मुख्यमन्त्री बनेका नेकपा एमाले संसदीय दलका नेता यामलाल कँडेलले २१औँ दिन आज मन्त्रीमण्डललाई पूर्णता दिएका हुन् ।मुख्यमन्त्री कँडेलको सिफारिसमा पाँच मन्त्री र एक राजमन्त्रीले प्रदेश प्रमुख तिलक परियारसमक्ष पद तथा गोपनीयताको शपथ लिएका हुन् । जसमा माओवादीका तीन र एमालेबाट दुई मन्त्रीसहित एक राज्यमन्त्री छन् । माओवादीबाट बिनाविभागीय मन्त्रीका रूपमा रनसिंह परियारले शपथ लिइसकेका छन् । उनलाई जलस्रोत तथा ऊर्जा विकासमन्त्रीको जिम्मेवारी दिइएको छ । आठ मन्त्रालय रहेको कर्णालीमा सत्ता साझेदार दल माओवादीले चार र एमालेले मुख्यमन्त्रीसहित चार मन्त्रालय लिने गरी सहमति भएको थियो, जसमा माओवादीबाट आर्थिक मामिला तथा योजनामन्त्री महेन्द्र केसी, सामाजिक विकासमन्त्री वीरबहादुर शाही, उद्योग, पर्यटन, वन तथा वातावरणमन्त्री दुर्गहादुर रावतले पद तथा गोपनीयताको शपथग्रहण गरेका हुन् । यस्तै, एमालेबाट भौतिक पूर्वाधार तथा शहरी विकासमन्त्री शेरबहादुर बुढा र भौतिक पूर्वाधार तथा शहरी विकास राज्यमन्त्रीमा गमता विश्वकर्माले शपथ लिएका हुन् । उनीहरूलाई प्रदेश प्रमुख तिलक परियारले पद तथा गोपनीयताको शपथ गराएका हुन् । भूमि व्यवस्था, कृषि तथा सहकारी मन्त्री विनोदकुमार शाहले भने शपथग्रहण बहिष्कार गरेका छन् । उनले भौतिक पूर्वाधार तथा शहरी विकासमन्त्री नदिएको भन्दै शपथग्रहण बहिष्कार गरेका हुन् । आन्तरिक मामिला तथा कानुनमन्त्री भने मुख्यमन्त्री कँडेल आफैँले राखेका छन् ।।