सकिएन रविको थुनछेक बहस, शुक्रबार फेरी उपस्थित हुनुपर्ने

काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेको जिल्ला अदालत रुपन्देहीमा आज भएको थुनछेक बहस हेर्दाहेर्दैमा राखिएको छ ।

बिहीबार जिल्ला अदालत रुपन्देहीका न्यायाधीश प्रह्लादकुमार योगीको इजलासमा भएको थुनछेक बहसमा आज सरकारी वकिलको बहस सकिएको हो । पीडित पक्षका दुई वकिलको बहस भने बाँकी रहेको छ ।

अदालत स्रोतका अनुसार आज सरकारी वकिलको मात्र बहस सकिएको छ । पीडित र रवि लामिछानेका तर्फबाट बहस भोलि हुनेछ । आजको थुनछेक बहस सकिएसँगै लामिछानेलाई बुधबार जस्तै परिवारको जिम्मा लगाइएको छ ।

लामिछानेविरुद्ध बुटवलस्थित सुप्रिम ऋण तथा बचत सहकारी संस्थाको रकम अपचलन गरेको आरोपमा दालतमा मुद्दा दर्ता भएको थियो । सोही मुद्दालाई सघाउन मंगलबार भैरहवा गएका लामिछाने बुधबार बिहान अदालत उपस्थित भएका थिए ।

बुधबार लामिछानेमाथिको बयान सकिएको थियो, भने आज पनि थुनछेक बहस नसकिएकाले लामिछाने भोली शुक्रबार फेरी अदालत उपस्थित हुनु पर्नेछ । लामिछाने सँग सुप्रीम सहकारीको मुद्दामा ४ करोड बढी विगो माग गरिएको छ ।

सरकारी वकिलको कार्यालयले पूरक अनुसन्धान गरेर मुद्दा चलाउने राय लिएपछि रविविरुद्ध रुपन्देही अदालतमा मुद्दा दर्ता भएको थियो । पूरक र थप अभियोगसहित सुप्रिम सहकारीको रकम अपचलनमा संलग्न देखिएका ४२ जना प्रतिवादीविरुद्ध मुद्दा दर्ता भएको हो ।

लामिछाने पोखराको सूर्यदर्शन सहकारीको रकम अपचलन मुद्दामा पौष २५ गते जिल्ला अदालत कास्कीबाट ६५ लाख रुपैयाँ धरौटी बुझाएर रिहा भएका थिए । लगत्तै काठमाडौंको कालिमाटीस्थित स्वर्णलक्ष्मी सहकारीको रकम अपचलनमा परेको मुद्दामा पनि उनी काठमाडौं जिल्ला अदालतबाट ६० लाख रकम धरौटी बुझाएर रिहा भएका थिए ।