यस्तो छ आज देशभरको मौसम

काठमाडौं । हाल देशमा पश्चिमी वायुको प्रभाव रहेको छ । पश्चिमी न्यून चापीय प्रणालीको आंशिक प्रभावले कर्णाली र सुदूरपश्चिम प्रदेशको पहाडी भूभागमा आंशिक बदली भएको तथा बाँकी भूभागमा मौसम मुख्यतया सफा रहेको छ । 

मौसम पूर्वानुमान महाशाखाका अनुसार काठमाडौं उपत्यका तथा तराईका केही भूभागहरूमा हुस्सु लागेको छ । आज कोशी, मधेश, बागमती, गण्डकी र लुम्बिनी प्रदेशमा मुख्यतया मौसम सफा रहने सम्भावना रहेको छ ।

कर्णाली र सुदूरपश्चिम प्रदेशमा आंशिकदेखि साधारणतया बदली रही उच्च पहाडी तथा हिमाली भूभागका एक–दुई स्थानमा हल्का हिमपातको सम्भावना रहेको महाशाखाले जनाएको छ ।

आज काठमाडौं उपत्यकाको अधिकतम तापक्रम २४ डिग्री सेल्सियस र न्यूनतम तापक्रम ७ डिग्री सेल्सियसका बीचमा रहने अनुमान  गरिएको छ । आज सूर्यदय विहान ६ बजेर ५४ मिनेटमा भयो भने सूर्यास्त साँझ ५ बजेर ३५ मिनेटमा हुनेछ ।