ब्लिंकेनको भ्रमणका क्रममा चीनसँग फलदायी वार्ता भएको अमेरिकी भनाइ

china-america

अमेरिकी विदेश मन्त्रालयले चीनसँग रचनात्मक र फलदायी वार्ता भएको दाबी गरेको छ । चीन भ्रमणमा रहनु भएका विदेश मन्त्री एन्टोनी ब्लिंकेनले चिनियाँ विदेशमन्त्री छिन काङसँग गरेको वार्तापछि अमेरिकी विदेश मन्त्रालयले उच्च तहमा संवादका च्यानलहरु खुला राखेर सम्बन्ध अघि बढाउने सहमति भएको जानकारी दिएको हो । विदेशमन्त्री ब्लिंकेनले सबैखाले समस्याहरुलाई संवाद मार्फत समाधान गर्नका लागि चीनसँग प्रस्ताव गरेको मन्त्रालयले जनाएको छ । चीन पनि त्यसका लागि तयार भएको अमेरिकी भनाइ छ । चिनियाँ विदेश मन्त्री छिनले अमेरिकासँग स्थिर, अनुमान गर्न सकिने र रचनात्मक सम्बन्ध चाहेको बताउनु भएको पनि अमेरिकी विदेश मन्त्रालयले जनाएको छ । चिनियाँ विदेशमन्त्रीले चीन–अमेरिका सम्बन्धमा ताइवान नै मुख्य बिवादको विषय रहेको भन्दै ताइवानको विषय चीनका लागि निकै संवेदनशील हो भन्ने पनि प्रष्ट पारेको बताइएको छ । ब्लिंकेन विगत पाँच वर्षमा चीन पुग्ने पहिलो उच्च तहका हुन ।