भारतमा भएको सडक दुर्घटनामा १३ जनाको मृत्यु

एजेन्सी । भारतको दक्षिणी राज्य कर्नाटकमा बुधबार भएका दुई छुट्टा छुट्टै सडक दुर्घटनामा १३ जनाको मृत्यु हुनुका साथै अन्य २० जना घाइते भएका भारतीय प्रहरीले पुष्टि गरेको छ ।

भारतीय सञ्चार माध्यमका अनुसार दुर्घटनामा मारिएका सबै तरकारी विक्रेताहरू थिए, जो आफ्नो उत्पादन नजिकैको थोक बजारमा बेच्न गएका थिए ।

घाइतेहरुलाई हुबली जिल्लाको अस्पतालमा भर्ना गरिएको छ । घाइते मध्ये केहीको अवस्था गम्भीर रहेकाले मृतकको सङ्ख्या बढ्न सक्ने आशङ्का गरिएको छ ।

छुट्टा छुट्टै दुर्घटनामा राज्यको राईचुर जिल्लामा यात्रु बोकेको गाडी पल्टिँदा करिब २० वर्षका तीन विद्यार्थी सहित चार जनाको मृत्यु भएको छ भने १० जना घाइते भएका छन् ।

दुर्घटना हुँदा गाडीमा करिब १५ जना सवार थिए । 
रासस