अध्यादेश मार्फत कानुन बनाउनु गलत : कांग्रेस नेता साउद

रुपन्देही । नेपाली कांग्रेसका नेता एनपी साउदले दुईतिहाइ बहुमतको सरकारले अध्यादेशमार्फत कानुन बनाउनु सकारात्मक नभएको बताएका छन । 

आज रुपन्देहीको बुटवलमा पत्रकारहरुसँग कुरा गर्दै उनले बहुमत हुँदा पनि संसद बैठक नचलाएर बन्धक बनाउन खोज्दै अध्यादेशमार्फत कानुन बनाउनु गलत भएको बताएका हुन । नेता साउदले अध्यादेशमार्फत ल्याइएका विषयवस्तुमा विपक्षी दलको पनि समर्थन हुने खालका विषय भए पनि संसदमा नलैजाँदा प्रश्न उठेको बताए । 
पूर्वमन्त्रीसमेत रहेका नेता साउदले ओली नेतृत्वको सरकारलाई नेपाली कांग्रेस पार्टीले साथ दिएको भएपनि जनअपेक्षा अनुसार काम हुन नसकेको गुनासो गरे ।

दुई दलबीचको न्यूनतम साझा सहमती कार्यान्वयन नभएको गुनासो आइरहेको भन्दै त्यसलाई पूर्ण पालना गर्न उनले ध्यानाकर्षण गराए । नेता साउदले संविधानलाई उन्नत बनाउने विषयमा राष्ट्रिय सहमति कायम गरेर परिणाम आउने गरी काम गर्नुपर्नेमा जोड दिए ।।