काठमाडौँमा श्री जगन्नाथ रथयात्रा शुरु

काठमाडौँमा श्री जगन्नाथ रथयात्रा शुरु भएको छ । आईतवार राष्ट्रपति रामचन्द्र पौडेलले काठमाडौंको प्रज्ञा भवनबाट रथ तानेर रथ यात्राको शुभारम्भ गरेका हुन् । सो अवसरमा राष्ट्रपति पौडेलले जगन्नाथको मूर्तिमा फूलअक्षताले पूजा गर्नुका साथै आरती समर्पणसहित रथमा राखिएको मूर्तिको दर्शन गरेका थिए । जगन्नाथ रथ यात्रा हरेक वर्ष असार शुक्ल पक्षको द्वितीया तिथिबाट शुरु हुने गर्दछ । जगन्नाथलाई भगवान श्रीविष्णुको रुपमा लिने गरिन्छ । धार्मिक मान्यता अनुसार एकपटक बहिनी सुभद्राले आफ्ना भाई कृष्ण र बलरामलाई शहर हेर्ने इच्छा व्यक्त गरिन् । त्यसपछि दुवै दाजुभाईले बहिनी सुभद्राको लागि तयार पारेको भव्य रथ ल्याइ त्यसमा सवार भएर तीनै जना शहर घुम्न निस्किए । घुम्ने क्रममा तीनै जना गुण्डिचामा काकीको घरमा गएर ७ दिन बसे । सोही क्रममा उनीहरुले शहरको भ्रमण सकेर घर फर्किए । त्यसबेलादेखि हरेक वर्ष तीनै दाजुभाइ र दिदीबहिनीको प्रतिक रथमा राखेर शहर घुमाउने र काकीको घर गुण्डिचा मन्दिर लैजाने गरिन्छ । रथ यात्रामा बलरामको रथ अगाडि, बहिनी सुभद्राको रथ बीचमा र जगन्नाथको रथ पछाडि रहने गर्दछ ।