भ्रष्टाचार विरोधी आन्दोलनमा जुट्न एकीकृत समाजवादीको आह्वान

नेकपा एकीकृत समाजवादीले पार्टी पक्तिलाई भ्रष्टाचार विरोधी आन्दोलनमा जुट्न आह्वान गरेको छ । पार्टीको १० औँ राष्ट्रिय महाधिवेशनले समसामयिक १९ बुँदे प्रस्ताव पारित गर्दै पार्टी पङ्क्तिलाई भ्रष्टाचार विरोधी आन्दोलनमा जुट्न आह्नवान गरेको हो ।  बृहत् वामपन्थी एकता र सहकार्यका लागि आह्नवान गरेको सो पार्टीले नेपाली कांग्रेस र एमालेको पछिल्लो समीकरणलाई दक्षिणपन्थी अवसरवादको संज्ञा दिएको छ । यसैगरी महाधिवेशनले ९३ सदस्यीय केन्द्रीय कमिटी घोषणा गरेको छ । दशौं राष्ट्रिय महाधिवेशनको अन्तिम दिन शुक्रबार अध्यक्ष मण्डलका अध्यक्ष झलनाथ खनालले केन्द्रीय सदस्यहरूको नाम प्रस्ताव गरेका थिए । त्यसपछि महाधिवेशन हलले उनको प्रस्ताव पास गरेको हो । तत्काललाई पहिलेका पोलिटब्यूरो सदस्यलाई केन्द्रीय कमिटीमा राखिएको छ । बाँकी केन्द्रीय सदस्य यो कमिटीले चयन गर्ने खनालले जानकारी गराए । ९३ जना नै केन्द्रिय सदस्यहरुले शुक्रबार नै पद तथा गोपनियताको शपथ ग्रहण गरेका छन् ।  सबै केन्द्रिय कार्यसमिति सदस्यहरुलाई निर्वाचन विभाग आयोग प्रमुख माधव पौडेले शपथग्रहण गराए । २९९ सदस्यीय केन्द्रिय कमिटी रहने व्यवस्था गरेको एकीकृत समाजवादीले बाँकी सदस्य आगामी दश दिनभित्र पूर्णता दिने बताएको छ । यसअघि बिहीबार एकीकृत समाजवादीले अध्यक्षमा माधव नेपाल, सम्मानित नेतामा झलनाथ खनाल र महासचिवमा घनश्याम भुसाललाई सर्वसम्मतले चयन गरेको थियो ।