धापासीस्थित एक घरमा भीषण आगलागी

काठमाडौं ।  टोखा नगरपालिका वडा नं - ६ धापासीको शिव मन्दिर हाईटस्थित एक घरमा भीषण आगलागी भएको छ ।

त्यहाँस्थित भाईकाजी श्रेष्ठको साढे तीन तलाको घरमा आज साँझ ५ बजेतिर आगलागी हुँदा घर पूर्णरुपमा जलेर नष्ट भएको टोखा–६ का वडाअध्यक्ष शान्ता पौडेलले जानकारी दिइन् ।साँझ ५ बजेको समयमा ग्यास लिक हुँदा आगलागी भएको थियो ।

ठूलो कम्पाउण्डमा घर भएको कारण अन्य घरमा भने क्षति नपुगेको वडाध्यक्ष पौडेलले बताइन् । आगलागी भए लगत्तै खबर गरेपछि प्रहरी परिचालन गरिएको थियो ।

काठमाडौं, भक्तपुर र ललितपुरको दमकल र नेपाल प्रहरी र स्थानीयको सहयोगमा आगो निभाउने काम भइरहेको छ ।आगो पूर्णरुपमा नियन्त्रणमा आउन केही समय लाग्ने वडाध्यक्ष पौडेलले बताइन् । आगलागीबाट भएको क्षतिको विवरण भने आइसकेको छैन ।