सुर्खेतमा घरभित्र निसास्सिएको अवस्थामा फेला परेका आमा–छोराको मृत्यु

सुर्खेत । सुर्खेतको वीरेन्द्रनगर नगरपालिका–४, भैरवस्थानमा घरभित्रै निसास्सिएर आमा–छोराको मृत्यु भएको छ । मृत्यु हुनेमा ३० वर्षीया देविसरा थापा र उनका ६ वर्षीय छोरा रियान थापा रहेको छन् ।

घटना बुधवार रातिको हो । यद्यपि प्रहरीले बिहीवार बिहान मात्र जानकारी पाएको जिल्ला प्रहरी कार्यालय सुर्खेतले जानकारी दिएको छ । प्रहरीका अनुसार बेलुका खाना खाएर सुतेको र बिहान अबेरसम्म कोही बाहिर ननिस्किएपछि प्रहरीलाई खबर गरिएको थियो ।

घरभित्र कोइला बालेको र धुवाँले निसास्सिएको प्रारम्भिक अनुसन्धानबाट खुलेको प्रहरीको भनाइ छ । प्रहरीले भन्यो, ‘प्रहरी त्यहाँ पुग्दा तीन जना अचेत अवस्थामै फेला पारेर सबैलाई उद्दार गरेर अस्पताल पठाएको हो ।’ 

अस्पतालले आमा–छोरालाई मृत घोषणा गर्‍यो भने  ९ वर्षीय छोरी रिया थापा भने घाइते अवस्थामा रहेकाले कर्णाली प्रदेश अस्पतालमा उपचार भइरहेको छ ।