इजरायलद्वारा यमनमा हुथी बिरुद्ध आक्रमण,९ जनाको मृत्यु

एजेन्सी । इजरायलले आफ्ना लडाकु विमानहरूले इरान समर्थित यमनमा रहेका हुथी बिद्रोहीहरु लक्षित आक्रमण गरेको छ । 

इजरायलको आक्रमणमा  हुथी पक्षका ९ जनाको मृत्यु भएको हुथी समर्थित संचार माध्यमले जनाएका छन् ।  इजरायलले हुथी लक्षित सैन्य अखडाहरुमा शृङ्खलाबद्ध आक्रमण गरेको बताएको छ।

इजरायली सेनाका प्रवक्ताले यमनको राजधानी सानामा रेड सी बन्दरगाह र ऊर्जा पूर्वाधारलाई लक्षित गरेको बताएका छन् । यमनबाट प्रहार गरिएको क्षेप्यास्त्र मध्य इजरायलमा रोकिएको दुई घण्टाभन्दा कम समयपछि बिहिबार इजरायलले आक्रमण गरेको  हो। हुथीले प्रहार गरेको क्षेप्यास्त्रले इजरायलको तेल अवीवको छेउमा रहेको रमत गानमा एउटा विद्यालय र धेरै कारमा क्षति पुगेको छ ।हुथीहरूले २०२३ अक्टोबर मा गाजा युद्ध सुरु भएको लगत्तै इजरायलमाथि आक्रमण शुरु गरेका थिए ।

हुथीहरूले प्यालेस्टिनीहरूसँग ऐक्यबद्धता जनाउँदै आएका छन् । गत वर्ष प्यालेष्टिनी लडाकू समूह हमासले एक्कासी इजरायलमाथि हमला गरेर १२ सय इजरायली नागरिकहरुको हत्या गर्नुका साथै २ सय ५० जनालाई अपहरण गरेका थिए । त्यसयता इजरायल र हमासबीचको लडाई जारी छ । हुथीले हमासलाई सघाउँदै आएको छ ।