चलचित्र ‘पूर्ण बहादुरको सारङ्गी’को टिजर सार्वजनिक

काठमाडौं ।  आगामी कात्तिक १५ मा प्रदर्शन हुने चलचित्र  ‘पूर्ण बहादुरको सारङ्गी’को टिजर सार्वजनिक भएको छ।

करिब १ मिनेट ५१ सेकेण्डको टिजरमा गरिबीका कारण बुवाले झेल्नुपरेको अभाव, छोराको शैक्षिक सफलता, र बिछोडको पीडालाई प्रस्तुत गरिएको छ। टिजरलाई बुवाको मुख हेर्ने दिनको अवसर पारेर सम्पूर्ण बुवाहरूप्रति समर्पित गरिएको छ, जसमा सन्तानको लागि बुवाले गरेका बलिदान र सङ्घर्षलाई देखाइएको छ।

चलचित्रमा विजय र प्रकाशसँगै मुकुन भुसाल, बुद्धि तामाङ, अञ्जना बराइली, माओत्से गुरुङ, देशभक्त खनाल लगायतका कलाकारहरूको उत्कृष्ट अभिनय रहेको छ। सरोज पौडेलको कथा र निर्देशनमा बनेको यो फिल्म सेभेन सिज सिनेमा र बाँसुरी फिल्म्सको संयुक्त प्रस्तुति हो। 

चलचित्रको कथा गन्धर्व परिवारको जीवनमा आधारित सामाजिक–ड्रामा हो, जसको पटकथा तथा संवाद महेश दवाडीले लेखेका छन्।