प्रधानमन्त्री कप महिला क्रिकेटमा कोशी प्रदेशको लगातार दोस्रो जित

प्रधानमन्त्री कप महिला राष्ट्रिय टी–ट्वान्टी क्रिकेटमा कोशी प्रदेशले लगातार दोस्रो जित निकालेको छ । शुक्रबार त्रिवि क्रिकेट मैदान कीर्तिपुरमा भएको खेलमा कोशीले बागमती प्रदेशलाई ८ विकेटले हराएको हो । ८८ रनको लक्ष्य पछ्याएको कोशीलाई जित दिलाउन काजल श्रेष्ठ र अप्सरी बेगमले समान ४१–४१ रनको योगदान दिए । बागमतीका संस्कृति फुयाँल र सोनी पाख्रिनले समान १–१ विकेट लिईन् । यसअघि पहिला ब्याटिङ गरेको बागमतीले २० ओभरमा ८ विकेट गुमाउँदै ८७ रन बनाएको थियो । बागमतीका लागि यशोदा विष्टले ४१ र अस्मिना कर्मचार्यले २४ रन बनाएका थिए । कोशीका सबनम राई र अप्सरी बेगमले समान २ विकेट लिए । कोशीले पहिलो खेलमा बिहीबार कर्णाली प्रदेशलाई १० विकेटले पराजित गरेको थियो ।