रविको बयान सकियो,थुनछेक बहस हुँदै

काठमाडौ। चितवनको साहारा सहकारीको बचत रकम अपचलन गरेको आरोप लागेका राष्ट्रिय स्वतन्त्र पार्टी (रा.स्व.पा.)का सभापति एवं पूर्व गसहमन्त्री रवि लामिछाने माथिको बयान सकिएको छ । 

लामिछानेमाथि लागेको मुद्दाको बयानका लागि चितवन  जिल्ला न्यायाधीश दयाराम ढकालको इजलासमा पेशी तोकिएको थियो । लामिछाने आजै अदालतमा बयानका लागि उपस्थित भएका थिए । उनीमाथिको बयान सकिएपछि थुनछेक बहस हुनेछ  । त्यसपछि अदालतले साधारण तारेख वा धरौटीमा रिहा गर्ने वा पुर्पक्षका लागि कारागार चलानमध्ये एक आदेश दिनेछ ।

लामिछानेविरुद्ध मंगलबार चितवनमा साहारा सहकारीको बचत रकम ठगीसम्बन्धी कसुरमा मुद्दा दायर भएको थियो । कास्की, काठमाडौं र रुपन्देही जिल्ला अदालतमा उनीविरुद्ध संगठित अपराधको कसुरमा पनि मुद्दा दायर भएको थियो ।

साहारा चितवन बहुउद्येश्यीय सहकारीबाट गोर्खा मिडियामा आएको साढे ३ करोडका साथै अन्य सहकारी तथा विभिन्न माध्यमबाट गोर्खा मिडियामा आएको रकममध्ये ४८ करोड रुपैयाँभन्दा बढी रविको एकल हस्ताक्षरबाट खर्च भएको उनीमाथिको अभियोग पत्रमा उल्लेख छ । यो रकम खर्च गर्न रविले ८१४ वटा चेक काटेको विवरण छ ।