अमेरिकामा विमान दुर्घटना बारे अनुसन्धान जारी, ६७ जनाकै मृत्यु भएको आशंका

एजेन्सी । अमेरिकामा भएको व्यावसायिक विमान र सैन्य हेलिकप्टर दुर्घटना बारे विभिन्न कोण बाट अनुसन्धान थालिएको छ । 

नेशनल ट्रान्सपोर्टेसन सेफ्टी बोर्ड एनटीएसबीले वाशिङ्गटन डीसी नजिकै बिहीबार भएको विमान दुर्घटनाको कारण पत्ता लगाउन धेरै कारकहरूको सूक्ष्म अनुसन्धान गरिरहेको जनाएको हो । 

अन्तर्राष्ट्रिय सञ्चार माध्यमका अनुसार एनटीएसबीका अनुसन्धान अधिकारीहरुले दुर्घटना बारे उनीहरुले धेरै जानकारी पाएको तर आधिकारिक पुष्टि गर्न केही समय लाग्ने बताएका छन् । प्रारम्भिक प्रतिवेदन ३० दिनमा जारी गरिने बताइएको छ । 

दुर्घटनास्थल बाट ब्ल्याक बक्स फेला परेको छ । यसअघि अमेरिकी राष्ट्रपति डोनाल्ड ट्रम्पले वाशिङ्टन डीसी हवाई दुर्घटनाको कारण अझै थाहा नभएको र जाँच चलिरहेको बताएका थिए । बिहीबार वाशिङ्टन डीसीको विमानस्थलमा अवतरण गर्न लागेको यात्रुवाहक विमान सेनाको ‘ब्ल्याक हक’ हेलिकप्टर सँग ठोकिएर पोटोम्याक नदीमा खसेको थियो । 

विमानमा ६४ जना र हेलिकोप्टरमा ३ जना रहेका थिए । अहिले सम्म ३० जनाको शव फेला परेको छ । अन्यको खोजी जारी रहेको छ । दुर्घटना हुँदा ६७ जनाको मृत्यु भएको आशंका गरिएको छ । अमेरिकामा यस किसिमको दुर्घटना निकै दुर्लभ मानिन्छ । 

पछिल्लो दुर्घटना सन् २००९ मा भएको थियो । त्यो बेला न्युयोर्कको बफेलोमा विमान अवतरण हुँदा दुर्घटना भएको थियो, जसमा ५० जनाले ज्यान गुमाएका थिए ।