धरानमा धुमधामसँग मनाइयो सोनाम ल्होसार

काठमाडौं । सुनसरीका तामाङ समुदायले नयाँ वर्ष सोनाम ल्होसार २८६१ धरानमा  धुमधामसँग मनाएका छन् ।

नेपाल तामाङ घेदुङ संघ धरान उपमहानगरको आयोजनामा भएको पर्वमा सबै जातजाति, धर्म सँस्कृति तथा राजनीतिक दलहरुको उपस्थिति रहेको थियो । धरानको भानुचौकमा आयोजना गरिएको सो कार्यक्रममा सबैले सोनाम ल्होसारको शुभकामना दिएका थिए ।

पर्वको अवसरमा विहान सघले धरानको भानुचौकदेखि आफ्नो जातिय भेषभुसा डम्फू सहित अन्य जातिका सहभागितामा निकालिएको र्‍याली छाताचौक सिहदेबी, पुरानो बजारहुदै पुनः कार्यक्रम स्थलमा आएर शुभकामना आदानप्रदान कार्यक्रमको आयोजना गरिएको थियो ।

कार्यक्रममा राष्ट्रिय कलाकारद्वय प्रेम लामा र रन्जित लामा लगायतले बेजोड प्रस्तुति दिएका थिए  । गरुड वर्षलाई बिदा गरी सर्प वर्षको स्वागत गरिने भएकोले यो पर्व तामाङ समुदायले हर्सोल्लासका साथ मनाउने गर्छन् ।

यो उत्सव माघ शुक्ल प्रतिपदादेखि पूर्णिमासम्म मनाइने भएता पनि तामाङ समुदायमा विशेषगरी पाँच दिनसम्म घरघरमा उत्सव मनाइन्छ । तर पछिल्लो समय यो पर्व सार्वजनिक स्थलमा सबै एकै ठाउँ भेला भएर मनाउने प्रचलन बढ्दै गएको छ ।

पर्वका अवसरमा गुम्बाहरूमा पूजा, दज्र्यु गाड्ने, छो प्रसाद वितरण, शुभकामना आदानप्रदान, मान्यजनबाट आशीर्वाद लिने, चेलीबेटी र इष्टमित्रसँग भेटघाट गर्ने, सामूहिक भोज र साँस्कृतिक कार्यक्रमहरू सम्पन्न गरिने प्रचलन रहेको छ ।