हमासले आज ८ जना बन्दी रिहा गर्ने

एजेन्सी । प्यालेष्टिनी सशस्त्र समूह हमासले आज (बिहीबार) ८ जना बन्दी रिहा गर्ने भएको छ । 

युद्धविराम सम्झौता अन्तर्गत आज हमासले ३ जना इजरायली बन्दी र ५ जना थाइ बन्दीलाई रिहा गर्न लागेको हो । रिहा हुने ३ जना इजरायलीमा सेनाका २० वर्षीय जवान अगम बर्जर, २९ वर्षीय नागरिक अर्बेक येहुद र  ८० वर्षका मोशे मोजेज छन् ।

अनतर्राष्ट्रिय सञ्चार माध्यमका अनुसार रिह गर्न लागिएका ५ जना थाई नागरिकको नाम भने खुलाइएको छैन । गाजामा हमासको कब्जामा ८ जना थाइ बन्दी छन् । नेपालका एक र तान्जानियाका एक जना छन् । थाईका अरु दुई बन्दी र तान्जानियाली नागरिकको मृत्यु भइसकेको इजरायलले भनेको छ ।  तीन बन्धक रिहाइको बदलामा आज इजरायलले १ सय १० प्यालेस्टिनी बन्दीलाई रिहा गर्ने बताइएको छ । 

लामो प्रयास पछि अमेरिका, इजिप्ट र कतारको पहलमा दुवै पक्ष बीच युद्धविराम सम्झौता भएको हो । जस अन्तर्गत हमासले पहिलो चरणमा दुई पटक गरी ७ बन्धकलाई रिहा गरिसकेको छ भने इजरायलले २ सय ९० जना बन्धकलाई छाडिसकेको छ ।